"Войнаысь ивор"

Нырысетӥез удмурт газет потыны кутскиз 1915-тӥ аре, печатласькиз со Вятка (али Киров) карысь губернской земстволэн типографияз. Нош газетлэн нырысетӥ номерез дуннеез адӟиз 4-тӥ феврале.

Со вакыт дуннеын Нырысетӥ мировой война мынӥз. Калыклы вормон мылкыд пыӵатон понна Вяткаысь губернатор газетъёс кылдытон сярысь пуктэт кутӥз. Озьы, огдыре потыны кутскизы "Войнаысь ивор" удмурт газет, "Война увер" пор газет но "Сугыш хабарляре" бигер газет. Редакторе юнматэмын вал кык мурт: Пётр Глезденёв но Василий Крылов. Кык арнялы одӥг пол поттыны чаклам "Войнаысь ивор" газетлэн ар ӵоже 9 номерез гинэ потӥз. Куинь ар ӵоже, огъя валысь, поттэмын вал 27 номер.

Герман ожысь иворъёсты гожтэм сяна, газет калыклэсь улэм-вылэмзэ но возьматӥз, пӧртэм ужпумъёсты эскерись, визь-кенеш сётылӥсь статьяос печатлаз. 27 номеръёс пӧлысь "Войнаысь ивор" газетлэн куд-ог номеръёссэ, али утьыса возе Историяя, кылъя, литературая Удмурт институт.

"Удморт"

1917-тӥ аре феврале буржуазно-демократической революция ортчиз. Май толэзе Волга котырысь пичи калыкъёслэн съездзы люкаськылӥз, удмурт секциын соку чакламын вал "Войнаысь ивор" газетэз "Удморт" нимын поттыны.

Нырысетӥосызлы удмурт газетъёслы сӥзем статьяосаз Анатолий Уваров пусъе: "Таиз газет мур сюлмаськыны кутскиз удмурт калыклэсь улонзэ радъян сярысь. Печатласькизы удмурт агрономъёслэн, врачъёслэн, дышетӥсьёслэн статьяоссы". "Ӟырдыт сюлмын гожъямъёс калыкез вырӟытыны юрттӥзы" шуыса гожтэ но газетэ "Удмурт ныл" нимын гожъясьлэсь статьяосысьтыз ог люкетъёссэ тодэ вайытэ: "Ӝоген нош ик зӧк кенеш луоз. Соку Глазов каре мукет губерниысь но удмортъёс лыктозы. Тӥлед но, удмортъёсы, быръем адямидэс со кенеше ыстыны кулэ вал. Соку гинэ, удмортъёсы, юлтошъёстылэсь турскемзэс адӟыса, удмортъёслы пади ваён сярысь чакламзэс тододы. Соин ик, удмортъёсы, юлтошъёсыныды огазе люкаськыса, ачидэслы кулэ сярысь вераськелэ но Глазов карысь удмортъёслэн обществоязы гожтыса ыстэлэ".

Со вакыт Глазов карын удмуртъёслэн культурно-просветительской обществозы ужам ни, берлогес национальной обществоос мукет каръёсын но ёросъёсын кылдылӥллям.

"Виль Синь"

1917-тӥ арын октябре Россиен кивалтыны кутскизы большевикъёс. Кулэ вал советъёс пала котыр ласянь дурбасьтӥсь газет. "Удморт" газетэз соку воштӥз "Виль Синь". Газет потӥз Елабугаын, редакторе юнматэмын вал эсер Константин Яковлев. Азьвылгес большевикъёс но социал-революционеръёс ваче ке ужазы, берло куспазы вожвылъяськыны ӧдъязы.

Со дыре редакциен кивалтӥсе Трофим Борисов юнматэмын вал, 1918-тӥ арын октябрь бере ини газет вӧлмыны ӧдъяз "Гудыри" нимын. Нош куке Сарапулын кылдӥз Центральной Вотской комиссариат, Борисов отчы кошкиз, 1920-тӥ арысен толшоре "Гудыри" но отын потыны кутскиз. Иже вуэмезлэсь азьло, газетлэн редакциез Глазовын но ужаса вуттӥз, но кема ик ӧз.

Сю ар талэсь азьвыл но туннэ нуналозь

Туала "Удмурт дунне" газетлэн "атаеныз" трос аръёс ӵоже лыдъяськиз "Гудыри" газет. Нош малы вунэм "Войнаысь ивор"? Та юанлы валэктон утчаны басьтӥськиллям асьсэос "удмурт дуннеос".

- Кун архивъёсын бугыръяськыса, трос документъёсты эскерыса, журналистъёс тодосчиосын огкылэ вуизы: нырысетӥ удмурт газетлэн сюресэз ӵогемын "Войнаысь ивор" бордысен, - вера газетлэн редакторез Зинаида Рябинина.

Озьы, 2015-тӥ арын "Удмурт дунне" 100 ар тырмонзэ пусйиз. Та дано дырпуслы редакцилэн коллективез бадӟым ужез быдэстӥз – газетлэн дауръем историезъя книга поттӥз. Со озьы ик нимамын – "Удмурт дунне". Тупен-тупен усьтэ-возьматэ газетлэсь вордскемзэ, будэмзэ, кыдамзэ, секыт вакытъёссэ, туала улонзэ но туннэ нуналзэ.

Даур ӵоже удмурт газет 8 пол нимзэ вошъяз. Дас кык ар "Гудыри" нимын потыса, 1930-тӥ арын "Удмурт коммуналы" пӧрмиз. Быдӟым атыкай ож мынон вакытэ, 1943-тӥ арын, газетлэн выль нимыз луиз – "Советской Удмуртия", берлогес – "Удмурт правда". Война бере, 50-тӥ аръёсысен удмурт газет 20 сюрс тиражен потӥз. Нош 70-80-тӥ аръёсы сое ладӟисьёс эшшо йылӥзы: тиражез 25 сюрсозь но вуылӥз. Огыр-бугыр 90-тӥ аръёсы Совето Союз куашказ, газет но нимзэ воштӥз. 1992-тӥ арысен со потэ ини "Удмурт дунне" луыса.

Газетъёсын ӵош ик шаерамы вырӟиз книга поттон уж. 2018-тӥ аре "Удмуртия" книгапоттони 100 аръем юбилейзэ пусйиз. Данъяськымон историзы мукет удмурт изданиослэн но: "Ӟечбур!" газетлэн, "Кенеш", "Вордскем кыл", "Кизили", "Инвожо" журналъёслэн. Уйпал удмуртъёс понна 30 арлэсь ятыр ни потэ "Иднакар" газет.

Одӥг липет улын

Туннэ, куке ивор сётӥсь ёзэсъёс юн азинскизы но паськытазы, печать амалэн потӥсь газет-журналъёс ас интызэс утьыны-юнматыны тыршо. Быгатонэз но кужымез огазеян вылысь удмурт изданиосты бурд улаз кутэ Йӧскалык печатья юрт. Ми но, "иднакаръёс", ужмес со улсын азьланьтомы. Нош туннэ ужъя эшъёсмес но лыдӟисьёсмес сюлмысьтымы ӟечкыласькомы праздникен – Йӧскалык печатьлэн нуналыныз!