Конкурсэз радъясьёслэн чакламзыя, проект шараяны юрттоз лидеръёсты, азьмынӥсьёсты, кудъёсыз дасесь ас улон интыоссэс умоятыны, интывылзэс адӟем карымон лэсьтыны. Соос радэ шедьыны быгато огшоры адямиос но, огазеяськонъёс но.

Конкурсэ пыриськон понна куронъёсты сётыны луэ вал кылем арын 1-тӥ мартысен. Куронъёс вуизы шаерысьтымы котькуд ёросысь но Можга, Камбарка каръёсысь. Огъя валысь, 306 заявкаос.

Вормисе потӥзы 35 проектъёс, грантъёслэн огъя лыдзы - 9,5 млн манет. Котькуд проектлы, шорлыдын вераса, ог 250 сюрс манет усе.

Уйпал ёросъёс та ужрадлэсь палэнэ уг кылё.

Вормисьёс радэ шедиз Глазов ёросысь "Музей обрядов" проект но.

Пӧжы (Золотарево) гуртын улӥсьёс утьыса возё уйпал удмурт калыклэсь йылолъёссэ, крезьёссэ (туспуктэм вылын). Соосты паськытгес вӧлмытон но вуоно поколениослы возьматон понна чакламын вал "Музей обрядов" проект.

Солы луыса, кылдытэмын интерактивной площадка, кытын возьматъялозы калык обрядъёсты, дӥськутъёсты но ужан, сиён-юон тӥрлыкъёсты.

"Музей обрядов" гурт понна гинэ ӧвӧл, быдэс ёрос понна культурно-просветительской интылы пӧрмоз, музейлэсь но гуртлэсь данзэ ӝутоз, туристъёсты кыскоз. Кибашлыос киужъёссэс вузаны быгатозы, нош дышетскисьёс но егитъёс тунсыко туспуктэмъёс, видеофильмъёс лэсьтыны но исследовательской ужъёсын вырыны дышетскозы.

Вормисьёс радын – Ярысь кык проект.

Культурая но спортъя "Радуга" центрлэн проектэзлы луыса, егитъёсты крезьгур инструментъёсын шудыны, кырӟанъёссэс туала оборудованиен гожтыны дышетозы.

Кыкетӥезлэн проектлэн кылдытӥсез - Егитъёслы психолого-педагогической юрттэт сётонъя "Шанс" центр. Татын ужасьёс библиотеказы пушкын бадӟым граффити лэсьтыны но азбарзэс этнической стилья чеберманы чаклало.

Вормисе потӥзы балезиноос но. Культураез но калык творчествоез азинтонъя центрын ужасьёс культурной зонаос кылдытыны малпаллям. Отчы люкаськыны но огъя кенешыны мед быгатозы азьмынӥсьёс, проектъёс гожтӥсьёс но пӧртэм кичӧлтонъёсты азинтӥсьёс.