Ужтэк уг улы

Бисарпиез берло аръёсы одӥг улӥсез возиз-утиз на, со но улонысь кошкиз ни. Дениспиын ог дасо коркан улӥсьёсыз вань на. Гуртэз утчаса ветлонэз ӧвӧл, Глазов-Игра сюрес вылысь указатель паллянэ возьматэ.

Гурт пала шаплы вамышъя рюкзакен кышномурт, сое ми машинаямы пуктӥмы.

Озьы одӥгеныз улӥсен матысьгес тодматскимы, гуртлэн улон-вылэмез сярысь но солэсь тодӥмы.

Надежда Леонидовна Нелюбина пенсиын ни. Кема аръёс со ужам колхозын дояркаын, кунян но сюдэм. 55 арес тырмыса, пенсие кошкем, но дораз пукемез уг ик поты ай.

- Кӧня ке фермае сторожаны ветлӥ. Магазинэ ӧтизы но, отчы мынӥ. Огнам улӥсько, нош уж дурын, калык пӧлын, нунал но ӝоггес ортче, - шуэ.

Сюрес вылын пумиськыкумы, со ӵапак Быдыпиысь лыктэ вылэм. Магазинын утялске ке, ужъёссэ быдтыса, гуртаз бертыны потэм.

- "Движение – жизнь" шуо ук, мон но нунал понна ветлӥсько. Пие аналскыны косэ ни, но, пока быгатӥсько на, пӧй, ужало, - азьланьтэ кышномурт веранзэ.

Сиён-юон но мукет вуз, мар кулэ, отысь ик басьтыса вае. Гуртазы нокыӵе магазин но, мукет мерлыко юртъёс но ӧвӧл, но улӥсьёс куштэмын уд шуы. Куинь пол, пе, арняяз автолавка ветлэ, тазалыксы пумысен быдыпи эмчиос сюлмасько. Концертъёсын но быдыпиос вуыло. Нош почта ачиз Надежда Леонидовна ворттэ.

- Куинь газет ваисько, ачим ик люкылыса ортчисько. Куке соку гуртамы клуб нергемы вал, али бервылыз но ӧвӧл ни. Ыжгидмы, валгидмы вал. Но мон фермаын Быдыпиньын ужай, вить ӵошен ми татысь ветлылӥм.

Надежда Леонидовна та гуртэ артысь Дӥньшурысь бызем. Соку, 70-тӥ аръёсы, ог 50 коркан улӥсьёсыз вылӥллям. Калык ужаз, пудо-живот вордӥз, котькуд коркан нылпиос будӥзы. Табере – кин кытын. Ярам, выль тодмомылэн нылпиосыз котыраз: одӥгез, пе – Такапиньын, мукетыз – Быдыпиын, Дениспиньын улӥсез но вань. Соос вӧзын кышномуртлы но капчигес.

Гужем лачак калык

Выжы улӥсьёс пӧлысь тужгес бадӟым арлыдоез Каркина Глафира Васильевна, со 87 аресэз выжем ни.

- Туж чупрес на. Кылыз но, пыдыз но мынэ. Корка котыраз берга, сое уте-возе, - валэктэ Надежда Нелюбина.

Нош мукетыз пересь гуртозы коркасьтыз потоно луэм ни, кемалась ӧвӧл нылыз доры Яре улыны кошкем. Ӧд ни ке быгаты, кытчы пырод?

Кудӥз улонысь кошке, кудӥз пиналъёссы доры улыны выжо. Секыт мылкыдъёслы-малпанъёслы, огназ улыса но, уг сётскы Юрий Нелюбин. Пенсие потытозяз ик, колхозын механизатор луыса ужам со. Али юртъерез котырын турске. Ӟезьыез чеберъямын пулэсь лэсьтэм киужъёсын.

- Наличникъёс но маке-маке мукетсэ ачим лэсьтылӥ, пилаосы но мар вал. Али уг ни соин выриськы.

- Мӧзмыт ӧвӧл-а гуртады? – юаськомы пиосмуртлэсь.

- Мар мӧзмыт луоз? Гужем калык лачак татын. Глазовысь но лыкто, сад-бакча возисьёс вань, - шуэ со.

- Сирень, льӧмпу сяськаяку макем шулдыр татын! – мылкыдзэ усьтэ Надежда Леонидовна но. – Тани вадьсамы ик дикой яблокпу будэ, со сяськая ке – чип тӧдьы, куарез но уг адскы. Ой, чебер!

Коркаос пукто

Шулдыренызы гинэ калыксэс возьыны пичи гуртъёслы уг ни кылды. Уж ке ӧвӧл, егитъёс кошко. Но Дениспилы удалтэм шуыны луэ: бадӟым сюреслы матын сылэ, уж матысь гуртъёсын шедьтыны луэ.

Тани одӥгаз коркан Андрей Кутявин улэ, солы 25 арес гинэ. Гуртоосыз верамъя, ужаны со Балезиное ветлэ. Мыло-кыдо пияшлэн аслаз тракторез вань. Дениспиос шумпото, пу-а ваёно, бакча-а гыроно – солы вазисько. Андрейлэн выныз но гуртазы ик улэ. Семьяеныз кемалась ӧвӧл выль корка пыриллям. Бадӟым, йыг-йыг корказы Кутявинъёслэн гуртэ пыроннын сылэ. Ӵукналы быдэ вадьсазы автобус дугдылэ, пиналзэс школае нуэ.

Дениспилы кемалась ини синмаськемын одӥг мушкась. Гуртлэсь ӧжыт палэнэгес интыям со пасеказэ. Соин но тодматскеммы потыса, дасяським ни вал дораз мыныны. Пыдын лёгем сюресэз пельтэм но, ӧм ни дӥсьтэ. Веразы на: Дениспие, пе, со корка пуктыны малпа. Корка ӝутӥсьёс вань бере, озьыен, гуртлэн улонэз азьланьтӥське.