Глазов понна та учыр адӟытэк-шӧдытэк но кылиз. Со ӧвӧл сокем нимо-дано, книгаос со сярысь гожтымтэ, нимысьтыз передачаос ӧз лэсьтылэ, туспуктэмез но Данъян пул вылэ шедьымтэ. Огшоры адями, но юн сямо, шырыт сюлэмо, усто ужась, чагыр малпанъёссэ улонэ пыӵатыны быгатӥсь - ӵапак сыӵеос вылын та дунне возиське.

Галина Александровна кадь лякыт кышномуртъёслы луыса, шудо нылпиос будо, ваньмыз ӟечез но чеберез выжыысь выжые утиське. Соос ик вордскем кылзылы но, калык сям-йылолъёслы но бырыны уг сёто. Нош туала аре, глобализация но унификация вакытэ, та уж - одӥгез сюлмаськытӥсез. Ас выжыостэ тодон, утён - со туж кулэ.

Юбилейзэ удмурт сям-йылолъёсъя та дуно эшмы нырысьсэ ортчытӥз. Куноосыз но удмурт дэремен лыктӥллям, бадӟымъёс гинэ ӧвӧл, пичиос но. Мылкыдзэ но малпанзэ улонэ пыӵатыны юрттӥз "Удмурт нылкышно кенеш" огзаеяськонлэн Глазовысь но ёросысь ёзэтэзлэн кивалтӥсез Марина Наговицына. Шаплы но синмаськымон егит кышномурт понна та уж дебютэн луиз, арганчиен Юра Наговицынэн ӵош юбилейлы сӥзем ӝытэз туж быгатыса но чебер радъязы.

Кемалась ӧй ни шӧдылы вал асме сокем капчи но задор – пинал дыръям вуылӥ кадь! Малпасько, мукетъёсызлэн но куноослэн сыӵеесь мылкыдъёссы вал. Удмурт но ӟуч яратоно кырӟанъёс ӝытбыт чузъяськизы, шулдыръяськемысь одӥг минутлы но ӧм дугдылэ.