Гурт дорысь нюкын та интыосын шер пумиськылӥсь емыш – нюр эмезь (морошка) будэм. Соя гуртэз Нюрмезь шуиллям. Аръёс ортчемъя нюрмезьёс узыр улыны кутскиллям. Бускель гуртъёсын улӥсьёс соослы вожъяськиллям, мыскылляса гуртсэс Нумыресь шуыны кутскиллям. Валамон ини, улӥсьёслы та ним ӧз кельшы. Соослэн куремзыя 1961-тӥ арын гуртэз Берёзовка нимазы. Уго, гурт пушкын но, котыраз но трос веськрес кызьпуос будо.
Тури колодчаос
Котькуд гуртэн тодматскыку, марке но йӧспӧртэмзэ, тунсыкозэ синйылтыны тыршиськод. Берёзовкае пыронын ик син шорам тури колодча йӧтӥз. Таӵезэ туала улонын ӵем адӟыны уг луы ни. Соин ик пичи пинал сямен шумпотӥ. Вашкала улон борды йӧтскем кадь потӥ, лэся. Гурт шорысь нош ик сыӵе колодчаез адӟыса, чылкак лӧптӥ. Кызьы меда та вашкала колодчаос ышыны-бырыны ӧз шеде?! Тае улӥсьёслэсь одно ик юало шуыса малпай но урам кузя мынонме азьланьтӥ. Ог ньыльдон коркаем пичи гуртэз кык люкетлы тымет висъя. Бадӟым ик ӧвӧл со, толалтэ лымыен шобыртэмын, шунды шорын чилясь вуэз уг адскы. Татын гужем туж шулдыр луэ, дыр, шуыса малпай.
Урам кузя мынонъям котькуд коркаез чаклай. Соослэн аспӧртэмлыко наличникъёссы тунсыко потӥзы. Котькуд корка кузё ас сяменыз чеберъям соосыз: кин толэзё пусэн, кин шунды, тылобурдо пужыосын, кин яркыт ӵуж, льӧль, горд буёлъёссэ жалямтэ. Куд-ог ӟезьыос но суредъёсын, пужыосын чеберъямын. Кузёос тыршемен вужмыны кутскем юртъёс но шулдыр адско. Соос бордын мӧзмыса, кайгырыса кадь сыло тырттэм, буш коркаос. Урамын чал-чал, мынӥсь-ветлӥсез ӧвӧл. Пуныос гинэ но уг бызьыло, ваньмыз думемынэсь, лэся.
Дыртытэк уло
Улӥсьёсын тодматскон понна нырысь ик пыри Светлана Фёдоровна но Николай Егорович Серебренниковъёс доры.
Николай Егорович Берёзовкаын вордскем но вань улонзэ татын ортчытэм. Светлана Фёдоровналэн выжыосыз Варни гуртысь, пе. Кыкназы ик кузпалъёс гурт возёсын ужаллям, механизатор но пудо утись луыса. Нош али пенсиын ини. Озьы ке но, Серебренниковъёс гурт котыразы кыштыр бергало на. Парсь, ӟазег, курег, муш вордо. Бакчаязы котькуд ар мерттӥсько. Светлана Фёдоровна киужъёсын вырыны яратэ. Вуж дӥсьёсыз сэрттыса, пӧртэм пужыосын выжлёгетъёс керттэ. Николай Егорович мушъёс котырын берганы яратэ. Озьы дыртытэк, каньылля ортче улонзы. Кузпалъёс куинь нылпи будэтӥллям. Ваньзылэн соослэн семьяоссы вань ини. Берёзовкалэсь палэнын ке но уло, анай-атайзы доры ӵем вуыло.
- Мон соосты пӧрам сиёнэн пумитаны тыршисько, - вера Светлана Фёдоровна. – Пиналъёс нош милем со но та юртто.
- Кызьы-озьы гуртады вашкала колодчаос возисько на? – дасям юанме сётӥ кузпалъёслы.
- Ма, милям котькуд юртъерын колодча вань, ву гумыосысьтымы ву уг вия уго. Водопровод лэсьтэмзы бере 1-2 ар гинэ бызиз со. Ву башняез мукет интые пуктоно вылэм. Солэн вуэз уг тырмы вал. Собере сое аналтӥзы, насоссэ мукет интые нуизы, мукетъёссэ но ёзъёссэ (детальёссэ) тарказы. Озьы ми колодчаос вылэ кылимы. Кинлэн вашкала туриос сыло на, кинлэн киын бергатоноосыз, кинлэн насос тыремын ини.
Серебренниковъёс кылдэм югдурлы уг ӝожтӥсько. Дышиллям ни, лэся. Соослэн колодчаязы насос, пе, понэмын. Вузы уг бырылы.
Дорысьтызы потыса, азьланьтӥ гуртэн тодматсконме.
Дорез понна сюлмыз висе
Берёзовка гурт "Тольён" муниципал кылдытэтэ пыре. Та поселениын ТОС (территориальной общественной самоуправление) амалэн уж азинске. Берёзовкаын ТОС-лэн кивалтӥсез Павел Игоревич Серебренников луэ. Соин та воргоронэн пумиськеме потӥз.
Кузпалыз но, Маиса Ивановна, гуртын кемдӥз. Со "Турнес" гурт возёсын кунян сюдӥсь луыса ужа. Ӵукна сюдӥськемез бере, гуртаз бертэмын вал. Павел Игоревич та дырлы нокытын уг ужа, пе. Гурт котырын но уж тырме, шуэ со.
- Пичи гуртъёсын улӥсьёслы саклык ӧжытгес висъяське, соос пӧртэм шуг-секытъёсын пумиськоно луо. Шӧдӥськоды-а сое ас вылады? Кызьы сыӵе югдурез тупатыны тыршиськоды? - юасько воргоронлэсь.
- Шуг-секытъёс вань ке но, туж ик ӝожтӥськем уг поты. Ма быгатӥськом, лэсьтыны тыршиськом. Кылем арын тани ас кужыменымы нылпи площадка лэсьтӥмы. Мукет ужъёс борды но басьтӥськы вал - кужым уг тырмы: техника, егит калык ӧвӧл. Кылсярысь, урамысьтымы сюреслэн ог 50 метр люкетэз гужем туж нӧд улэ, ветлыны ик уг луы. Сое ӝутыны сюй но вань, техника гинэ кулэ. "Турнес" возёсысь тракторъёс ветлыса сюресэз сӧро, нош тупатыны уг дырто. Тымет вылтӥмы но сюресмес юнматоно. Кӧня ке ар талэсь азьло сое тупатӥмы вал, азьланяз но эскерыса возёно, медаз сӧриськы шуыса.
Воргоронэз куштэм коркаос но сюлэмшугъяськыто. Угось соослэн куашкам кенеръёссы урамез чик но чебер уг каро.
- Нош Турнесозь сюресты кыӵе мар возиське? Туннэ лыктыкумы номыре ӧй вал кадь.
- Пӧртэм сямен луылэ, - вера Маиса Ивановна. - Куддыръя дырыз дыръя уг сузяло, но сюрестэк уг возё. Гуртамы автобусэн школае ветлӥсь пиналъёс вань, соин сузяны тыршо.
Фермаын ужась нылкышноос Турнесэ нуналаз кык пол ветло, соин ӟеч сюрес соослы туж кулэ.
- Азьло Берёзовкаын ветыл но кунян возён фермаос вал, табере нокыӵеез но ӧвӧл, - вера Маиса Ивановна. – Ма, али доръёсамы но скал ум возиське ни. Гуртмы понна кык гинэ скал вань на. Нош учконо ке, котырак пудо возьман интыос, турын турнатэк лымы улэ кыле. Фермеръёсмы гинэ но гуртамы ӧвӧл.
Кузпалъёс Павел Игоревичлэн атай юртаз уло.
- Ноку нокытчы кошкылэмды ӧз-а потылы? – юасько соослэсь.
- Мон пинал дыръям гармошкаен шудӥсько вал, соин музыкальной училищее туж ысто вал, - вера Павел Игоревич. - Но анай-атаймы улонысь вазь кошкизы, быдэ вуымтэ пиналъёс огнамы кылимы, соин нокытчы дышетскыны ӧй ни мыны. Табере мон гармошкаен шудыны нылылэсь пизэ дышетӥсько. Сое дорамы куное ӵем вайыло. Вордскем гуртам мыным яра, нокытчы кошкеме уг поты.
Маиса Ивановна дышетскемезъя эмчи (медсестра) вылэм. Но уж шедьымтэен фермаын ужаны кутскем. Озьы ик та удысын тырше ини. Кузпалъёс одӥг ныл будэтӥллям. Со семьяеныз Як-Бодьяын улэ.
Удмурт кылэз гажало
Гуртысь потыкумы, автобус витён остановка шоры ӟеч-ӟеч учки на. Отын удмурт сямен "Берёзовка. Дугдылонни" гожтэмын. Шӧдске, удмурт кылэз татын гажало шуыса. Юнме шат та пичи гуртысь сомында удмурт кылъя дышетӥсьёс потӥзы! Галина Азарьевна Образцова, Лидия Васильевна Ложкина, Надежда Игоревна Перевозчикова, Надежда Ивановна Ураськина… Мукетъёсыз но дано улосчиоссы ӧжыт ӧвӧл, дыр. Гурт улэп дыръя соос, малпасько, уз вунэ.