Минек Модамасторонть лангсо пек ламо ломанть. Весе сынь явовить башка раськева. Эрьва раськенть эсензэ келезэ, эрямо лувозо, коензэ – кирданзо, конатнень марто моли пингеде пингес.
Минек Модамасторонть лангсо пек ламо ломанть. Весе сынь явовить башка раськева. Эрьва раськенть эсензэ келезэ, эрямо лувозо, коензэ – кирданзо, конатнень марто моли пингеде пингес. Ансяк келесь вейсэнди ломантнень, сюлми сынст ютазь шканть марто. Ансяк келесь канды ломанентень сюпав потмоёжомарямот. Ды, нама,вансты минек ойменек, сюпавчинек, штобу сынст аволинзе сэве чемень.
Вана истямо сюпавчикс монень ашти тиринь эрзянь келем, кона ютась касомань ды келейгадомань кувака ки. Мон сонзэ пек вечкса. Вечкса васняяк секс, мекс чачинь эрзянь велесэ, покштян – бабан, авам – тетям – весе эрзят. Васень валон ёвтынь те чевте ды гайтев кельсэнть, секскак сон монень пек малавикс ды питней.
Мон важодян Андрей велень школасо рузонь келень ды литературань тонавтыцякс, ды зярдо максть тень тиринь келень ды литературань част, мон апак кавтолдо карминь сынст ветямо. Сынь монень пек вечкевить. Арасть истят тюст, образт, арсемат,конатненень аволь муеве минек кельсэ виде ёвтамо. Сон пешксе мазычиде, жольниця лисьмапрянь ведте, кода гайги монь эпиграфсонть Е.И.Пятаевень валморонь саевксэнть эйсэ.
Минек Образованиянь Министерствась ламо мель яви видестэ тонавтомантень ды келень ванстомантень. Монь койсэ, школань предметнэнь ютксо эрзянь келесь саи башка тарка, секс мекс неть уроктнестэ эйкакшось пурны содамочи лия предметнэнь коряскак.
Тирин келень коряс пелькстамотне ( олимпиадатне) теевсть эрьва иень коекс аволь ансяк минек школасо, буесэ, но и Республикасонокак. А ледстян истямо ие, зярдо Адрей велень тонавтницятне авольть моле неть пелькстамотнес. Те шкас ардтнесь эйкакштнень марто Т.В.Кутурова, ней вана мон. Ды эряви тешкстамс,што пек чуросто тосто сакшнотано таркавтомо. Свал лиснетяно изницякс .
Вана тедидеяк, эйзюрковонь 1 –це чистэ ульнесь ютавтозь 25 – це Межрегиональной олимпиадась Саранск ошсо, косо пек парсте невтизь минек школань тонавтницянок : Левщанов Андрей ( 9-це класс) – изниця, ды Куманева Алёна (11-це класс) – 2-це тарканть, эсь содамочист тиринь келень коряс. Истя кирдемс!!! Пек кенярдовты те кулясь!
Мон, кода тиринь келень ды литературань тонавтыця, пек кеман, што эрзянь келенек свал карми эрямо, секс што минек ундоксонок эрзянь раськестэнть.
Ней ёвтан паронь арсемат весе эрзятненень: шумбрачи,од вийть икелев молемасо!
А минек келенек гайгезэ масторонок келес ды ёвтни кезэрень раськеденть, сонзэ ине ломантнеде.
Татьяна Горина