Школазэ йылпумъяса, одӥг ар колхозын ужаз, собере Глазовысь техникумын техник-строительлы дышетскиз. Техникум бере ужаны Туме келязы. Лена кузпалыз медучилищеын тодон-валан люказ.
- Ми школаын ӵош дышетскылӥм, - тодаз вае Елена Викторовна.
– Одӥг парта сьӧрын но пукылӥм, та ӟеч дышетскылӥз. Школа бере, газетысь объявление шедьтыса, эшеным Омутнинске медучилищее мынӥм, кутӥзы акушере. Ум но тодӥське вал, кин со, мар со. Ужай Фалёнкаын роддомын, 89 пинал вайыны юрттӥ. Нырысетӥзэ кыктоос вордскизы, каль соослы 36 арес луоз ни. Врач ӧй вал, ми санитаркаен ӵошен. Со мыным шуиз, эн, пе, кышка, ваньмыз умой луоз. Бызем берам, мужикеным Туме мынӥ, отын фельдшерзы вал, мыным инты ӧз шедьы бере, колхозэ кариськи. Олеглы 21 арес тырмиз, армие басьтӥзы, мон пинал витисько вал. Армие кошкон азяз монэ Ниж. Уканэ, мумы-айыосмы доры вайыса кельтӥз. Шедиз Афганистанэ. Службаысь лыктыкуз, нылмы вераське ни вал.
Данилов кузпалъёс вордскем гуртазы ик кылизы. Елена Викторовна пудо вордон удысын тыршиз, Олег Геннадьевич – лэсьтӥськонын. Пумен эшшо кык пиналъёссы вордскизы на.
- "Новая жизнь" колхозын ужасез трос вал, котькуд гуртын нимысьтыз бригада, нош Уканын - ньыль. Гидъёс, складъёс, мастерскойёс, коркаос пуктылӥмы, - мачке Олег Геннадьевич. – Милем но колхоз корка лэсьтӥз, ачим ик ужай. Соку ик нырысетӥ гурме пуктӥ. Пӧрмиз кадь. Собере айилы лэсьтӥ на. Соку ведь котькуд гуртын печникъёс вал, одӥг-кык пол подсобником ветлӥ, адӟи, кызьы мар кароно, валай.
Озьы пумен уж ас ӧраз пыриз. Кибашлы воргоронлы гуртоосыз-бускельёсыз вазиськыны кутскизы. Сомында ар ӵоже калыклы кӧня шунтӥськон, пыжиськон инты лэсьтӥз, кудӥзлы одӥг пол гинэ но ӝутымтэ ни. Али тросэз Чайковскийысь кирпич басьто, со чебер, но ӝог, пе, сутске. Глазовын но Ярын ӟеч кирпич поттылӥзы, но заводъёс пытсаськизы.
Гуртъёсы газ вуиз ке но, калык зӧк гурлэсь уг куштӥськы. Зӧк гурын пыжем шаньгиез, перепечез номырин но уд ӵошаты ук. Азбаразы, беседкаосазы но гур интыясез вань.
Олег Даниловлэсь гуръёссэ адӟыны луэ Яр ёросысь тымет дуре интыяськем шутэтскон интыысь но, сое шуо на "Маша и Медведь".
Фермеръёс
Даниловъёс фермерлэсь ужзэ но ас вылазы эскеризы. Укмыстонэтӥ аръёсы секыт улон луиз. Колхозын уждун тыремысь дугдӥзы, кызьы ке быдэс ар ӧз сётэ.
Ӵапак соку кунамы фермер движение кутскиз. Яр ёросын одӥг мурт ас ужзэ мытӥз. Со шоры учкыса но, колхоззы лябомемен но, Даниловъёс фермер кариськыны малпазы. Кызь гектар музъем басьтӥзы. Созэ дун тырытэк висъязы. Со сяна государстволэсь юрттэт ӧз вуы.
- Музъем сётӥзы, но техникамы ӧй вал, трактор но соку басьтыны секыт вал, мырдэм шедьтӥм вуж Беларусь. Скал, парсь котьку но вордылӥмы, йӧл-сӥль вузаса, каньылля эшшо пудо басьямы на. Самой троссэ ньыль скал вордӥмы. Кыскылӥмы киын. Кызьы ке аппарат басьтӥм, кутским кыскыны, как скалмы тэтчиз ук, пудо ведь аппаратлы дышыны кулэ. Йӧл Глазовысь молокозаводэ сдать карылӥм, татын молокоприёмник вал. Каньылля выль корка пуктӥм. Фермер луыса регистрироваться кариським 1996-тӥ арын.
Мумы-айызы бордын нылпиоссы но вордскем дырысен ужаны дышемын. Кызьы асьсэос шуо, пиналъёссы луд вылын будӥзы.
- Нылмес куать аресаз вал вылэ пуктӥм но пастуханы келям. Пичи пимы но 6-7 арес котыр дыръяз тракторен ветлыны кутскиз. Турын калтыку, самой пичи скоростьсэ пуктӥсько, со сылыса рулевать гинэ каре, каньылля мынэ, - мачке атай.
2010-тӥ арын Даниловъёс фермер ужлэсь куштӥськизы. Арысь аре ужбергатонлы тросгес куронъёс пуктыны кутскизы, трос бумага ужез луиз. Вытъёс кекатӥзы. Табыш басьтӥд-а, ӧд-а, но арлы быдэ 36 сюрс манет налог тыр, быдэс ошпи дун луэ.
- Пиналъёс будӥзы, кошкизы, ваньзылы вылӥ образование сётӥмы. Нылъёсмы Глазовын уло, кыкназы пиналъёсын пуко, пимы – Ижын. Кынармы но егит дыръя кадьӧвӧл ни. Курег, кеч, ыж вордӥськомы на, - шуо Даниловъёс.
Олег Геннадьевич ёрос кенешлэн депутатэз луэ. Быгатэмезъя калыкезлэсь улонзэ умойгес карыны турске.
Нош азьпалан гужем. Гур пуктыны нош ик куронъёс вань ни. Ваньмон дыръяз картэзлы та ужын юрттэ Елена Викторовна. Со лэсьтэм гурлэсь шовъёссэ волятэ-чеберма.