Кытын кунояз "Палэзьпу"?
Толэзь ӵоже ёросысь ёросэ вуылӥз "Палэзьпу" статуэтка – семьяез, тупаса но гажаса улонэз данъясь пус.
"Палэзьпу" - Юкаменск ёросысь туризмъя "Тылыс" огъетын тыршисьёслэн малпанзы. Соос кичӧлтэмъя 15-тӥ куартолэзе – Семьялэн калыккуспо нуналаз – ялэмын вал "Зов родников" ёроскуспо фестиваль, кудӥз улсын трос пӧртэм ужрадъёс ортчизы. Озьы, фестивальлэн пусэз – Палэзьпу-нылаш – Юкаменск ёросысь Корепановъёслэн трос нылпиё семьяысьтызы выжиз Яр ёросысь Шутовъёслы. Собере со кунояз Глазов ёросысь, эшшо одӥг синмаськымон семьяын – Адамысь Невоструевъёс дорын. Отысь, эстафета сямен, киысь кие со выжиз Балезино ёросысь Кожило гуртысь Казаковъёслы, собере – Красногорск ёросысь Бараны гуртысь Булатовъёслы. Котькытын сое шумпотыса пумитазы.
Тройча нуналэ "Палэзьпу" берен дораз вуиз – "Тылысэ", татын сое витё ни вал Зянтерековъёс. Еленалэн но Константинлэн кык мусо нылъёссы будо, семьяязы яратон но гажан кузёясько.
Та ужез йылпумъясен луысал на эшшо одӥг тунсыко ужрад, кудӥз ваньзэсты люкасал Тылысын, но коронавирусэн югдур секытгес луэмен, сое ортчытыны ӧз пӧрмы.
Ми пыриськиськом!
Фестиваль улсын ик семьяос куспын ялэмын вал "ЭтноСемья" но "Семейное блюдо" онлайн-конкурсъёс. Карын та ужез радъяны оскемын вал 17 номеро школалы.
Туж ушъямон: трос семьяос пыриськыны мылкыд каризы. 8-тӥ июле - Семьялэн, яратонлэн но осконлэн нуналазы – конкурсэз радъясьёс вуылӥзы Глазове, вожвылъяськонын вормем семьяосты пусйыны.
Ческыт пӧраськыны быгатэменызы висъяськизы Бушмелевъёс, соослэн видеороликсы учкисьёслэсь тужгес трос куараос люказ. Нош вормисе потӥзы кык семьяос: Балезиноысь Казаковъёс кылдэ ньылымон "Рассада" десерт дасяны быгато вылэм, нош Глазовысь Михайловъёслэн семьязы – "Тэка" бигер пирожки. Та семьяос дипломен но кузьымъёсын пусъемын.
Глазовысь Кондратьевъёс - "ЭтноСемья" конкурсын вормисьёс.
- Ми кузпалыным кыкнамы ик ужаськомы шаертодонъя музейын, калыкмылэн вашкалаез, солэн сям-йылолъёсыз – милемлы матын но тодмо. Соин, ялонэз адӟимы гинэ, соку ик шуимы: "Ми пыриськиськом!" Гриша пимы нырысетӥ классэз быдтӥз, солы но тунсыко потӥз. Конкурслэн куронъёсызъя, лэсьтоно вал кык туспуктэм: одӥгаз – семья вашкала йӧскалык дӥсен, мукетаз – туала асьме дӥсенымы. Уйпал удмуртъёслэн дэремъёссы вань музеямы, ми сое кутӥмы. Гришамылы вал юн тунсыко вашкала дэрем дӥсяны, изьы поныны, кут кутчаны. Адӟылэмез вал ке но, ас вылаз мертамез ӧй на вал. Милемлы ужъя эшъёсмы юрттӥзы, музейысь ужасьмы ик туспуктэмъёс но лэсьтӥз. Вашкала дӥськутэз дӥсян, туспуктэмъёсы пуксён – ваньмыз капчиен но серемпотонъёсын ортчиз, - тодаз вае Ирина Кондратьева.
Вормисьёс радэ шедемзы сярысь эшъёссылэсь тодӥллям, асьсэос со вакыт Пермь улостӥ туристъёс сямен юмшаськомы, пе, вал. Пӧртэм каръёстӥ, тунсыко интыостӥ путешествовать карон – семьялэн одӥгез ӟеч сямыз. Кунгур пещерае одӥг пол ветлӥллямзы ни, но соку Гришазы укыр пичи на вылэм, туэ выльысь мынӥллям – мед валаса адӟоз ни шуыса. Озьы ик Чёртово городищее вуылӥллям, Пермь улосысь мукет каръёсын тодматскиллям.
Выжыосызъя Ирина асьме дорысь, картэз – Казахстан палъёсысь. Нош тодматскыны но кузпалъяськыны кылдэм соослы - Москваын. Бадӟым карын кӧня ке улыса, удмурт шаере лыктыны малпаллям: татын милемлы сюлэммыя – чус, каньыл, котыр ласянь ӟеч, шуо.