Ӵектосъёс бордын чырмыт ужаменызы, гуртъёсын трос ӟечез но адӟем карымонэз лэсьтэмын. Та ужез быгатыса радъя поселенилэн тӧроез Надежда Сабрекова.
Кыӵе воштӥськонъёс вань поселенилэн улоназ, мар пусйымонэз лэсьтэмын но вуоноезлы кыӵе малпанъёсын-мылкыдъёсын улэ гурт тӧро – вераськиськомы Надежда Михайловнаен.
- "Современная городская среда" программая ужаськомы 2018-тӥ арысен, со улсын посёлокысьтымы кык интыосын бадӟым уж лэсьтэмын ини – шор площадьын но спортъя городокын. Кыкез ик соос асфальтэн шобыртэмын. Спортъя городокын табере волейболэн но, баскетболэн но шудыны усто, отын тренажёръёс, воркаутэз вань. Шор площадьмы но юн ӟеч луиз, гурт интывылъёсты азинтонъя программая отын нылпиослы шудон площадка пуктэмын, со нимысьтыз резина вӧлдэт вылэ инъямын. Шумпотӥськом, куке улӥсьёсмылэсь тау каремзэс кылӥськом. Пусъёмы на: та программая ужъёсмы вуоно аре но азьланьтӥськозы, шор площадьысен нылпи сад дорозь тротуар лэсьтыны медӥськомы.
- Нош кыӵе югдур артысь пичи гуртъёсын, отын шӧдо-а воштӥськонъёсты?
- Гурт удысъя но сиён-юонъя министерствоен радъям программае пыриськыса, Трубашуре туэ быгатӥмы куинь контейнер площадкаос пуктыны, соос вань куронъёсты чакласа лэсьтэмын. Оглом поселениямы жуг-жаг люкан 18 площадкаос усьтэмын, ӝыныез гинэ куронъёслы тупасесь ай. Ас мылкыдзыя трубашуръёс самообложениея программае пыриськизы, озьы ошмессэс благоустроить каризы. Омутницаын улӥсьёс но туж мыло-кыдоесь. Со программая ик гуртазы ньыль контейнеръёс пуктэмын. Туэ нылпиослы шудон площадка усьтӥзы, тазэ малпанзэс элькун конкурс пыр быгатӥзы улонэ пыӵатыны.
- Октябрьское пырыку ик, син шоры йӧтэ выль асфальт сюресты. Таиз уж кызьы пӧрмиз?
- Одӥг но ӝыны иськем сюресмы быдэсак выльдэмын: посёлоке пыронни, Школьной урамлэн ог люкетэз но Наговицын урам. Уже 9 миллион манет котыр уксё кутэмын, сое элькун бюджетысь висъязы. Калык кемалась ӝожтӥськылӥз ни та сюреслэн уродэзлы. Вылтӥз ветлыны луонтэмысь, сюрес урдсытӥз лёгемын ни вал, соин маке пасьта ни луиз. Та сюрес ведь школьной маршрутэ пыре, пиналъёсты Умскысь, Туктымысь, Трубашурысь но Котныревоысь ваё. Ёрос администрацилы тау карыны кулэ, со сюлмаськемен та бадӟым ужпумез палэнтыны луиз. Со сяна, школа азбаре сюресэз но асфальтэн шобыртыны пӧрмиз на.
Быгатэммыя тыршиськом гуртъёсысь но сюресъёсты тупатъяны. Туэ быдэн одӥг урамъёсты Туктымын но Трубашурын волятыны пӧрмиз. Туж урод ни Трубашуре сюрес. Туж оскиськом, куке солэн но дырыз вуоз шуыса.
- Али трос вераськонъёс мыно Путинэн ялэм дунтэк газификация пумысен. Улӥсьёслэсь куриськонъёс вань-а?
- "Школа" массив, кытын выль микрорайон усьтэмын, со быдэсак газифицировать карымтэ на. Октябрьский посёлокъя та дыре ог 30 куриськонъёс догазификацилы сётэмын ни. Нош оглом ог 40 пала юртъёсы чагыр эстӥськон пыртымтэ на. Тодмо ни: догазификацияя ужъёсты вуоно аре ортчытозы.
Шумпотымон, газ ӝоген вуоз Трубашуре, газовикъёс гумыос кыско ни. Нош собере чагыр эстӥськон вуоз Туктыме но.
- Туннэ понна одӥгез лэчыт ужпум герӟаськемын коронавируслэсь вакцинация ортчытонэн. Улӥсьёсты дырто-а прививка лэсьтыны?
- Нырысь-валысь ӧжытэз лэсьтӥзы, но али чупырскогес ни. Культура, дышетон удысын ужасьёс ваньзы кадь вакцинироваться кариськемын, мон ачим но, ӵош ужась эшъёсы но пуктӥмы. Тросэз одӥг пол пуктӥськись "СпутникЛайт" вакцинаез витё.
- Гурт поселениен кивалтонэ Тӥ вуиды дышетон удысысь. Тӧро луыса ужамдылы туэ вить ар луэ. Быгатӥды-а малпанъёстэс улонэ пыӵатыны, азяды пуктэм ужпумъёсты быдэстыны?
- Школаын ужаме 26 ар луиз, пиналъёсты историлы дышетӥ. Куке поселениен кивалтонэз кутоно луиз, пумит ӧй кариськы: асме мукет удысын эскереме, мар ке но выльзэ лэсьтэме потӥз. Уже сюлэмыя, коллективмы умой. Шуг-секытъёс, конечно, вань. Тӧроослы трос йӧтэ надзорной органъёслэсь, со-та лэсьтэм потэ, нош уксё ӧвӧл, яке ӧжыт. Вазиськисьёслы юрттэм потэ, гурт калыклэсь улонзэ ӟечгес карем потэ. Вот та ӧрын вань улонэ али берга-кошке.
Гурт поселениен кивалтыны капчи ӧвӧл, уката но нылкышно понна со – секыт ныпъет. Тау шуисько: трос ӟеч адямиос вӧзам ужало, шунытэсь кусыпъёсмы гурт эштосэн. Кинлы но уг вазиськиськы, пумит верась ӧвӧл. Тросэз соос – дышетэм пиналъёсы, "Лэсьтом, Надежда Михайловна", - шуо. Валамзы, юрттыны дась луэмзы оскон но кужым сёто, мылкыдэз ӝуто. Нош малпанъёс, быдэстоно ужъёс – лачак: тротуаръёс лэсьтоно, сюресъёсты тупатъяно, борщевикез быдтоно, ву гумыосты но выльдоно, очистной сооружениосты но выльысь пуктоно.