Ас вордскем интыостэ, пичи родинадэ яратон сое ӝикыт-чылкыт возён вылысь кутске. Та малпанэз трубашуръёс ас вылазы, ас уженызы юнмато. Мар асьмелы вашкалаосмы, мумы-бубыосмы кельтӥзы-сётӥзы, сое утем сяна, одно ик сюлмаськыны кулэ сое уноятыны, эшшо чебергес, эшшо умойгес карыны – мед соин пиналъёсмы но нуныкаосмы данъяськозы, шуо.

"Эшшо одӥг ӟеч ужез быдэстӥмы! Быдэс гуртэн!" - сыӵе ивор вотэс бамъёсын потӥз Трубашурысь лулчеберетъя юртлэн огиназ. Туспуктэмъёсъя но адӟиське, макем мыло-кыдо но сюлмысь тыршиллям ошмессэс благоустроить карон бордын.

Малпанзы кемалась ни вылэм. Быдэстон понна ӵектос дасяллям, уксё люкаллям, озьы, самообложениея программае пыриськиллям. Гуртлэн старостаез Иван Максимов, воргоронъёсты ӝуткан понна, Юкаменск ёросысь Тылыс базае но нуллэм, юри адӟытыны, кызьы лэсьтоно шуыса.

Кенешемын, стройматериал басьтэмын, табере киосын ужано. Николай Михайлович Перевощиков но Анатолий Леонидович Шибанов котьмар ужлы мастёресь, соос ик подрядчик чотын уж борды кутскизы. "Октябрьский" эштос но палэнэ кыльымтэ, со кулэ техника висъям, нош гуртозы Евгений Ворончихин ас мини-экскаваторзэ поттэм.

"Сюлэм шумпотэ!" - верало трубашуръёс, ужзы шоры учкыса. Ошмесысь юзмыт вуэз юыны басьтэм сяна, гуртоос татчы дӥсьсэс гылъяны лыктозы – со понна нимысьтыз интыез вань, тусь инъямын.

Таиз бордынгес ик липет улэ пыртэм эшшо одӥг тунсыко инты.

- Пыласькыны отын купелез но вань. Тылысын сямен, вуаз пырыны тубат но лэсьтэмын - макем умой, макем чебер! - лӧптэм мылкыдъёссэ усьтэ Надежда Главатских.

Огъя кариськыса, котькыӵе но малпанэз быдэстыны луоно. Ӟеч уж адямиосты огазея, кужым но мылкыд сётэ, вылез ужлы лӧпкытэ. Кызьы вераз ни лулчеберетъя юртлэн кивалтӥсез но трос ӟеч ужъёслы кичӧлтон сётӥсь Надежда Чиркова, вуоно аре ошмес котыре ӟусъёс пуктыны, писпуос но сяськаос мерттыны малпало: мед, пе, азьло сямен ик шулдыр но чебер луоз.ро