21-тӥ шуркынмонэ буре ваизы удмурт азьветлӥсез Иосиф Наговицынэз.
Ужрадэ пыриськизы Глазовысь 17 номеро школаысь нылпиос но дышетӥсьёс. Озьы ик палэнэ ӧз кыле "Удмурт кенеш" огазеяськонлэн Глазовысь но ёросысь ёзэтэзлэн ёзчиосыз но ёрос библиотекаын тыршисьёс.
Дано улосчизылэсь нимзэ но ужъёссэ уг вунэто Глазовын но Туктым гуртын улӥсьёс. Кулон нуналаз Иосиф Наговицынлэн мемориал пулъёсыз доры сяська керттэтъёс понэмын вал.
Тодэ уськытом: 1921-тӥ арын 5-тӥ январьысен 26-тӥ июнёзь Вотской автономной областьлэн революционной комитетэз интыяське вал Глазовысь Киров урамысь 11 номеро юртын. Со вакытэ ӵапак отын ужаз Иосиф Наговицын.
Кылем арын, Удмурт автономилэн 100 аръем юбилеяз, та юртлэн борддор вылаз Иосиф Наговицынлэн нимыныз мемориал пул юнматэмын вал.
Солэсь азьвыл, куарусён толэзе, Иосиф Алексеевичлэн нимыз сётэмын Глазовысь 17 номеро школалы.
Мемориал пул озьы ик юнматэмын Туктымысь культурая юрт вылын но. Азьвыл татын школа интыяськылӥз, отын дышетскиз пичи Иосиф но. Нош туэ, 31-тӥ августэ, Туктым гуртын, Иосиф Наговицынлэн семьяезлэн азьвыл улэм интыяз стенд юнматэмын вал.
Стенд усьтэмын "Туктым – земля предков" проектлы луыса, сое улонэ пыӵатыны лулысь-сюлмысь тырше Наговицынлэн матысь ӵыжы-выжыез Валентина Хазиахметова.