- Одӥгаз методической семинарын, кудӥз Ижын ортчиз, УдГУ-ысь преподаватель паймемзэ вераз, гуртъёсысь выпускникъёс туж ӧжыт ас шаерзэс адӟемын-ветлэмын шуыса. Школаын дышетскытозязы, шуэ, элькунмылэн шоркараз гинэ но вуылымтэ, нош макем трос асьмелэн тунсыко но синмаськымон интыосмы. Верамез милемыз малпаськонэ уськытӥз. Тӥни озьы мылкыды кылдӥз, нылпиосмылы Удмуртиез возьматыны, - вера Дондыкар школаысь географиен дышетӥсь Ольга Русских.

Ужъя эшъёсыз ӟеч ужлы дурбасьтӥзы, озьы, ӵошен ӵектос дасян борды кутскизы. Ӵектосазы пусйизы: кытчы вуылозы, мае адӟозы, кыӵе мылкыдъёсын ветлозы – туспуктэмъёс но постъёс пыр ваньзэ мерлыко вотэсъёсын возьматозы. Пиналъёслы но со туж кельшиз. Нош йылпумъясен луыны кулэ вуылэм интыосысьтызы туспуктэмъёсын лэсьтэм электрон энциклопедия.

Макем шумпотӥзы, куке тодӥзы, ӵектоссы "Лукойл" огазеяськонэн ялэм конкурсын вормисьёс радэ потӥз но грант утӥз шуыса. Озьыен, гужем каникулъёсы пиналъёс путешествие потозы! Карта вылазы - Удмуртиысь каръёс но ёрос центръёс, нош нырысетӥен луоз – Ижевск.

Жаляса верано, гужембыт уксё вуэмез витьыса, мылкыдъёссы пумен-пумен пуксизы но ни. Куарусён толэзе уксё вуиз, но улонамы пӧртэм сюбегатонъёс пыризы коронавирусэн сэрен. Куд-огез классъёссы карантинэ пуктэмын вал. Озьы, сӥзьыл каникулъёс но ортчизы, нокытчы потатэк.

Та нуналъёсы шумпотон ивор вуиз: шутэтскон нуналэ, школа автобусэ пуксьыса, пиналъёс но дышетӥсьёссы-кураторъёссы Юкаменск ёросысь Тылыс базае вуылӥллям. Мылкыдъёссы лӧптэмын – котырысь чебер инкуазьлэсь, пайдаен ортчытэм дырлэсь, валче шутэтскемзылэсь.

Азьланяз соосты витё выль тунсыко интыос. Сюрессы капчи медло!

Глазов ёрос.

Туспуктэм Дондыкар школалэн

ВКонтакте огинысьтыз.