Коронавирус ветлэ
Архангельское гуртын ковидэн тросэз висемын. Кыкетӥзэ но курадӟисьёс вань ни, пе. Али нош воксё "вспышка", шуо улӥсьёсыз. Толэзь но ӝыны ӵоже коронавирусэн нюръяськем но тазалыксэ выльысь юнматыны вырем фельдшерзы Фаина Крысова но.
- Август пумын со вал, ачим отпускын. Нырысь температурае ӝутскиз, но нокыӵе мукет тодметъёсыз ӧй вал бере, ӧй но шугъяськы сокем. Витетӥ нуналаз ини зынъёсты шӧдэмысь дугдӥ, кызыны зол кутски. Пумен картэ но висьыны ӧдъяз, собере буби. Коркамес пытсазы, ваньместы Глазове нуизы. Озьы ми семьяен ковид-центре шедимы. 85 аресъем бубилэн прививкаез вал, малпасько, соин капчиен ортчытӥз. Тужгес секыт ачим виси – куло ни кожасько вал, кислород улын возизы, - тодаз вае Фаина Николаевна.
Али со уж дураз ни, но мугорезлэсь лябзэ шӧдӥсько на, шуэ. Кема дыр ӵоже зынъёсты но шӧмъёсты шӧдытэк улэм: оло картошка, оло яблок сие – огвыллем. Мае ке-мае ке берло дыре гинэ валаны кутскем ай.
- Ваньмызлы верасько: прививка одно ик пуктоно. Ас семьяям учырез валэктыны турскисько. Озьы ке но, куд огез уг дырто прививка лэсьтыны, берло жаляно медаз луэ вал, - азьланьтэ веранзэ эмчи.
Сюлмаськонэз гуртысь фельдшерлэн та вакыт трос. Коронавирусэн нюръяськон кемдӥз сӥзьыл пуэд висёнъёсын. Ярам, пиналъёслы грипплэсь прививка сентябре ик лэсьтӥз, нош бадӟымъёслы арня талэсь азьло гинэ ваиллям. Но тросэз сое али пуктыны уг быгато, уга коронавируслэсь прививка бере толэзь ӵоже вис кароно. Соосты декабрьлы гожтӥ ни, шуэ.
Гуртазы вань ни сыӵеос но, кинлы ревакцинация кулэ. Со понна Фаина Николаевналэн "Спутник Лайт" вакцина дасямын, тырмыт ваемын.
Кинъёс милемды воштозы?
Тазалыкез утён удысын Фаина Николаевна 30 арлэсь ятыр ни, пыр одӥг интыын – Архангельскойысь ФАПын.
- Мон будӥ артысь Чебаково гуртын, али со ӧвӧл ни. 9-тӥ классысен малпаськыны кутски, кин луо шуыса. Нылъёс совето вакытъёсы кык профессиос пӧлысь бырйылӥзы ук: дышетӥсь яке медик. Школа бере мынӥ Глазовысь медучилищее, сое йылпумъяса, татчы лыктӥ. Гуртамы улӥсез ог 700 котыр вал, ФАПын кык фельдшер ужазы. Эмъяськоннимы соку вуж поповской коркан интыяськиз, пуэн эстӥськиз. Пумен-пумен калыкмы ичиёмиз, школа-интернат кулэ ӧз луы ни но 2006-тӥ арын та кирпич юртэ выжимы. Одӥг липет улын табере культура юрт, библиотека, гурт администрация но ФАП. Ужаны кутскыкум, школаын 200 дышетскисез вал - али 15 кылемын, садике 50 нылпи ветлӥз – али 9. Огъя улӥсьёсмылэн лыдзы кык поллы ичиёмиз ни, - вера Фаина Николаевна.
Нош ужмы ӧжыт уг луы, шуэ. Трос дырзэ бумагаос басьто. Нимысьтыз саклык висъяно луэ пенсионеръёслы. Доразы ӧтисьёс уй но нунал луыло. Юрттэтлы вазиськыкузы, выходнойёсы но доразы дыртэ. Ужзэ яратэ, соин но, дыр, вожпотон дыръёсыз ноку вылымтэ.
Мумызылэсь адӟыса, эмчилэн ужезлы синмаськизы нылъёсыз но – кыксы ик пытьыостӥз мынӥзы. Одӥгез - Глазовын, мукетыз – Ижын ужало.
- Мон соослы номыре ӧй но ӵекты, ӧй но алы. Профессия асьсэос бырйизы, жалямзы сярысь огзылэн но верамзы татчыозь ӧвӧл. Одӥгез сюлмаськытэ: егитъёслэн гуртэ лыктэмзы уг поты, соку кинъёс милемыз воштозы? Ярам, отпускын дыръямы, али Бараныысь фельдшерен ог-огмес воштылӥськомы, - малпанъёссэ усьтэ Фаина Николаевна.
Ужзэ кулэезъя радъянлы эмъяськонниын ваньмыз вань. Зэм, инструментъёс но мукетыз вужесь ини, азьвыл юртысьтызы ваемын на. Кардиограф кулэ вал, шуэ, ремонт лэсьтэмез но витё ни. Умой – аптеказы вань, юртазы шуныт но югыт.
Соиз но ӟеч – туала улонлэсь бере уг кылё. Выль сямен ужан вуиз ни Архангельскойысь ФАПе но. Верамезъя, компьютерез ужаз кутон капчиен ӧз сётскы, ужрадлыкез валан понна куке дышетӥсьёслы, куке ужъя эшъёсызлы вазиськылэм, али но юрттэт куроно луылэ, шуэ.
- Шумпотӥсько, куке компьютерен ужакум, малы ке вылезлы дышисько ке. Кивалтӥсьёсмылы Красногорске жингыртӥсько: ачим уг ни мыны, цифра амалэн келяло, шуисько, - мылкыдъёссэ усьтэ Фаина Николаевна.
Красногорск ёрос.
Туспуктэмез авторлэн.