Дано лыдпусъёслы сӥзем концертэ Парзиын но матысь гуртъёсын улӥсьёс кылем пятницае, 17-тӥ толсуре, люкаськылӥзы. Лулчеберет удысын ужасьёсты но учкисьёсты ӟечкыланы вуылӥзы ёрос кивалтӥсьёс, поселенилэн тӧроез но трос мукет куноос.
Глазов ёросысь лулчеберетъя но туризмъя центрлэн кивалтӥсез Сергей Лекомцев пусйиз, ужпумъёс вань шуыса (клуб тупатъямез вите), но валтӥсез луэ – учкисьёслэн шуныт мылкыдзы, клубын ужасьёслэн мыло-кыдо тыршемзы, ӵапак соос гуртлэсь лулчеберетсэ утё.
Пуктыны выль, чебер, бадӟым юртэз юрттӥзы комсомолецъёс. Ӧсъёссэ со усьтӥз 1966-тӥ арын. Нырысетӥосыз сцена вылэ потӥзы Тёкысь но Парзи больницаысь артистъёс.
Та ӝытэ трос шуныт кылъёс чузъяськизы лулчеберет удысын ужасьёслы, лыктэмъёс тодэ ваёнъёсынызы но люкиськизы.
Николай Викторович Жуйков:
- Улон лобыса кадь ортче. 1988-тӥ арын 5-тӥ мае монэ сельсоветэ кивалтӥсе бырйизы. Уже кутскиз ӵапак та клубез тупатъян бордысен. Татын студенческой отряд ужаз. Полъёсты, вӧлдэтъёсты выльдӥзы, укноосты воштӥзы, соку ик пристрой лэсьтӥзы. Художникъёс оформление бордын тыршизы. Азьло та липет улын ик вал колхоз контора, сельсовет, почта, участковой интыяськылӥзы. Нош тупатъям бере, кылиз на клуб гинэ. Ёросын лулчеберет понна кыл кутылӥз Галина Юдинцева, со креслоос, люстраос шедьтӥз. Клублэн туннэ улонэз шоры учкыса, сюлэмам шуныт вӧлске, тыршеммы юнме ӧвӧл вылэм. Клуб калыкез огазея, ӟеч мылкыд кузьма.
Али культура юрт улсын 14 клубной формированиос ужало, пырисько отчы 6 аресысен 80 аресозь улӥсьёс. Тросэз соос сцена вылэ потазы, шумпоттӥзы учкисьёсты сюлэм пыр потӥсь гуръёсын, тунсыко хореографиен, чебер костюмъёсын но яркыт номеръёсын.
"Калык" нимзэ дано нуэ
"Чебершур" коллектив кылдытэмын вал 1985-тӥ арын, клублэн кивалтӥсез Надежда Васильевалэн кичӧлтэмезъя. 2011-тӥ арысен культурая юртэн но "Чебершурен" кивалтэ Светлана Пономарева.
Трос малпаськонъёс вал ним сётон пумысен, ваньмызлы сюлэмзыя луиз Клавдия Андреевна Баженовалэн ӵектэмез. Чебершур - со Парзилэн азьвыл нимыз. Коллектив сюлмаське удмурт культураез утён, калык пӧлы вӧлмытон сярысь. Кырӟало-а, экто-а, сям-йылолэз улӟыто-а - ваньмыз удмуртлыкез утёнлы сӥземын.
Коллективлэн трос вормонъёсыз ёрос, элькун конкурсъёсын но фестивальёсын. Кырӟасьёсты Удмуртилэн палэназ но тодо. 1998-тӥ арысен "Чебершур" "калык" ним нуллэ, 2016-тӥ арын коллектив та нимез юнматӥз.
Празднике лыктылӥзы нырысетӥосыз кырӟасьёс но, ӵапак соос коллективлы дан ваизы.
Вера Андреевна Пономарева:
- Вань улонме колхозын ужай, стаже 40 ар люкаськиз. Нош уж бере репетициосы дыртылӥ. Ми трос ветлӥмы концертъёсын, юн шулдыр улӥмы, коллективмы ӟеч вал. Ваньмызлэн шулдыр куараоссы, паллян ӧм мадьылэ.
Людмила Викентьевна Жуйкова, культурая юртлэн нырысетӥ директорез, кивалтӥз 1967-1974-тӥ аръёсы:
- Азьло кылдытӥмы фольклор коллектив. Отын пересь бабушъёс гинэ вал, вашкала удмурт кырӟанъёсты быдэстылӥзы, йылолъёсты возьматъяллязы. Асьсэлэн дэра дэремъёссы вал. "Чебершуре" мон сан-сан пенсие потэм берам ветлыны кутски, но каль уг ни ветлӥськы, коллектив выльдӥськиз ни. Юн интересно улӥмы, репетициосы, концертъёсы ветлылӥмы.
"Иднакар" газетын ужасьёс но шулдыр праздниклэсь палэнэ ӧз кыле. Парзиысь эшъёсмылы сӥзиськомы ваньзэ-ваньзэ умойзэ гинэ, мед быдэсмозы вань малпанъёссы.