Чеденниҥ эжигиниҥ jаагында мени, кирип клееткен айылчыны, корболоп öскöн хмель jыраныҥ койу бÿриниҥ ортозына jажынган кичинек кÿреҥ кискечек уткыды. Эжикти ачып, кирип барзам, бот ондо jÿрегим кööрöп, кöстöрим сÿÿнди. Алевтина Николаевнаныҥ чедениндöн кир барган кижи кандый да чöрчöк jерине келген кирезиндий бар. Айландыра кандый jÿзÿн чечектер jок деер: розалар, георгиндер, гортензиялар, ноготкилер, астралар, львиный зевтер, петуниялар ла оноҥ до öскöлöри. Чечектердиҥ ортозында агаштаҥ эдилген жираф, зебра, jаан ак ваннадаҥ jазалган уй ла оноҥ башка кееркемjилу бÿдÿштÿ солун эдимдер: "кÿлÿмзиренген" тöҥöштöр, "каткырышкан" чÿҥкелер, ташка jуралган кÿйе-коҥыстар. Алевтина Николаевнаныҥ "кичинек телекейинде" кажы ла неме тынду: мында эски резин сопоктор, ээлентизи jеткен колjунгуш, jараш будукла будулган, экинчи jÿрÿм алынган, каткырышкан кöстöрлÿ, кижиле эзендежип, куучындажып тургандый. Темдектезе, бу ла энезиниҥ алдындагы jе ле деген болгон, эмди тÿби ойылган, jаантайын кара кööгö уймалган чой казаны да бойыныҥ курсак азатан учурын бÿдÿрип, эмди кöк теҥериниҥ öҥиле будулган, ичинде чечектер отургызылган турды. Трактордыҥ эски кöлöсöзине толтыра суунаҥ уруп, оны будукла будуп, кичинек кöлмöк эдип салган. Ичинде сууда jаҥыс таркат араайынаҥ эзин соккондо, табылу эжинип турды. "Сананган амадуумла болзо, мында соондо кувшинкалар öзÿп, база тоолу таркат-суугуштар болор" - деп, Алевтина Николаевна айтты. Айылдыҥ ээзи айтканыла: "Алдында сÿре-чöп чачатан jерге барала, чек айрылып болбой jадарым (каткырат), ондо ойык бочоктор, эски сооткыштар, jарылган мячиктер - ончозын айылыма экелеле, тын кийдирип, нени-нени эдип салгадыйым. Уулым мени арбанып туратан".

Алевтина Николаевна бойы керегинде айдар болзо, бу jобош jалакай кÿÿндÿ эпши, 1961 jылда Мöндÿр-Соккон jуртта модор сööктÿ Махалиндердиҥ jаан билезинде чыккан. Адазы Николай Карманович, jажына колхозто малчы-табунщик болуп иштеген, энези Клара Васильевна Шодоева, атту-чуулу бичиичи Иван Васильевичтиҥ сыйны, канча jылдарга почтальон болуп иштеген. Алевтина Николаевна Горно-Алтайск калада зооветеринарный техникумда зоотехниктиҥ ÿредÿзин алган соҥында, Мöндÿр-Сокконныҥ колхозында зоотехник болуп, отдел кадровто, онойдо ок малчылардыҥ турлулары сайын газет апаратан почтальон болуп иштеген. Калганчы öйлöрдö Алевтина Николаевна магазиндерде садучы-продавец болуп иштейт. Jаҥыс уулын колго-бутка тургузып, эмди баркыларын кöрÿжет. Тургуза öйдö ÿч баркызыныҥ кару эрке карган энези болуп jат.

Чööлö öйинде кöлöсöлöрдыҥ покрышкаларын кезип, эдимдер jазап, олорды будыйт, öзÿмдерди чöп öлöҥнöҥ арутайт. "Слерге мындый jайалта кемнеҥ тÿшкен?" - деп суразам, Алевтина Николаевна энезинеҥ деп айтты. Бойыныҥ öйинде энези база чечектер сÿÿйтен. Кезик немени бойым санаанып, кезигин бичидип турган журналдардаҥ кöрÿп, таап эдедим, деп айдат. Эм тургуза Алевтина Николаевнаны jаан иш сакыйт, алтын кÿс келип jат, удабас ла кÿндер сооп баштагалакта, кезик чечектерди кийдирип, кезигиниҥ саптарын jулуп, тазылын сугар керек. Алевтина Николаевна: "Алдымда тургускан амадуларым, санааларым база бар ла. Кышкыда ойто чечектиҥ рассадазын отургызып, олорды сугарып, быжулап öскÿрер иш башталар" - деп айтты. Оноҥ jаскыда ойто ло огородтыҥ ижи. Балдардыҥ садыныҥ келиндери, анайда ок кöрÿш-таныштары Алевтина Николаевнаныҥ мындый jилбÿзин билип тура, ого кандый бир чечек отурзарга jарамыкту неме керек пе деп, сурагылап, экелип берет.

Öткöн jылда Мöндур-Соккондо ветерандардыҥ jурт Соведи jаан jаштулар ортодо "Зеленый двор" деп кöрÿ-конкурс öткÿрген болуптыр. Бу кöрÿде Алевтина Николаевна jеҥÿчил болуп чыккан эди.

Онойып, солун кижиле туштажып, таныжып, мындый jарашты кöрÿп, кÿÿн-санаам кöдÿрилди. Адакыда, Алевтина Николаевнага бек су-кадык, апарган ижи мынаҥ ары кöндÿгип, оноҥ ары jаранзын деп кÿÿнзейдим.