Минек районсо зярыя фольклоронь ансамблят. Неть морокуротнес совить ават, конатне пек вечксызь эрзянь ды рузонь моротнень. Коллективтне эрьвась эсензэ ладсо мазый, сынст аволь вейкеть репертуарост, сынст пек вечксызь минек райононь ды велень эрицятне, сынст парсте содасызь республикасонок ды Россиянь лия регионтнэсэяк.
Раськень культурань алкуксонь сюпавчикс ловови Андрейвелень фольклорной коллективесь. Сон пурнавозель-теезель 1985 иестэ. Пурныцязоль Кутурова Валентина Никифоровна. Сон, васняяк ульнесь морокуронть художественной прявтокскак. Васня ансамблянтень путозель лем “Аннушка”. Совакшность тов пенсиясо аштиця сыре ават. Седе ламо морсесть кувакат кезэрень эрзянь раськень морот, седе аламо неень шкансетнеде.
Вана се шкань ансамблянь участниктне: Ермушева Д.Ф., Куманёва Н.П., Кутурова А.Л., Ермушева Р.Н., Сорокина Л.А., МоисееваТ.А., Баркаева А.Д., Куманёва Т.К.
Морокурось ульнесь велень. Сень лангс апак вано, аватнень парсте содылизь Саран ошсо ды Нижегородской областьсэяк.
Эрьва косо сынь пек лембестэ вастозельть. Ламот юткстост ней уш кулость, ансяк сынст тевест апак стувто, сон поладозель. Нейгак сынст репертуаронь моротнень ды сеть койтнень-кирдатнень, конатнень сынь невтнесть эсест концертнэсэ, неень шкань морыцятне сайнить эсест.
1996-це иестэ саезь ансамблянь прявтокс ульнесь Учаев Валерий. Сонзэ пек чуросто вастневиця вайгелезэ, конась пек мазыйстэ сюлмавиль авань морамонть марто. Истямо морыця, кодамо Валерий, вастневи пек чуросто. Цёрась моравты вансты ды топавты кулозтнень поминамонь койтнень аволь ансяк Андрейвелесэ, райононь лия велетнесэяк. Сон мельстуиця, мельвановикс ломань сыретненень ды одтнэненьгак.
Ансамблянть репертуарсо "Вай, верьга. верьга..", "Косо, косо да Утяша", "Вай, иля пува…", "Уряжавкай", "За лесом солнце воссияло", "Нумолнэ" ды лия раськень морот.
2006 иестэ полавтовить морокуронтень совиця ломантне ды лемезэяк. Сонзэ лемдизь рузонь валсо “Истоки”. Ансамблянь неень прявтось Кутурова Валентина Петровна арси путомс тензэ эрзянь лем “Горнипов”. Андревелень фольклорной ансамблясь ульнесь зярыяксть "Шумбрат, Мордовия!" ды "Шумбрат, Финно-Угрия" фестивалень Лауреатокс, сон ламоксть казезель эрьва кодамо фестивалень Дипломсо.
Эрьва иестэ ансамблянтень совить од вайгельть, коллективесь тонавты ды совавты репертуарс од морот - “Уряжт”, “Айдо, ялгат, Кобалёвкав аштеме” ды лият. Андрейвелень эрямось свал сюлмазь “Истоки” фольклоронь ансамблянть марто. 2016 иестэ сон ульнесь "Вместе мы сможем больше" Республикань инвалидэнь художественной творчествань Фестивальсэнть ды казезель Дипломсо.
2017 иестэ ансамблясь невтизе Большеигнатовской райононть "Ярхцамаваста" "Традиции предков храним и возраждаем" Мордовия Республикань национальной гастрономической фестивальсэнть Ташто Шайгова велесэнть.
Ней ансамблясонть морыть:
Мамаева Наталья Григорьевна, Мамаева Наталья Ивановна, Левщанова Марина Викторовна, Мамаева Елена Петровна, Вирясова Валентина Павловна, Учаева Галина Ивановна, Шунеева Раиса Яковлевна, Кутурова Татьяна Геннадьевна, Ермушева Надежда Николаевна, Кутурова Валентина Петровна
“Истоки” морокуросо морыцятнень мелест - ванстомс раськенек коензэ-кирданзо, кандомс раськень моротнень ды морамонь лувонть икелев, неень шкань ды сыця шкань ломантненень.
Ташто Селищань "Вастома" фольклорной ансамблянть ламот содасызь 1953 иестэ саезь. Сеть умонь шкатнестэ морокуронтень совсесть велень хозяйствасо важодицят: скотинань трицят, скалонь потявтыцят: якасть морсеме школасо тонавтыцят ды культурань роботниктькак. Коллективсэнть ульнесть 18 ломанть.
Екатерина Константиновна Пятойкина сестэ важодсь ловномань кудосо библиотекарекс. Те сонзэ мелензэ коряс теевсь "Вастома" морокурось. Сонсь кармаськак ансамблянть прявтокс. Виев вайгель аватне пек кеместэ сюлмазельть моронь ды морамонь вечкемасонть. Мария Петровна Кутяйкина ( ней сон кулось) ды сондензэ седе одт Валентина Федоровна Дьякова ды Елизавета Алексеевна Сеняйкина ульнесть моронь ушодыцякс. "Позяря", "Андямо", "Дарюша", "Ваня леляй, ков молят" ды лия сынст репертуаронь эрзянь моротнень "Вастоманть" кувалма кармасть содамо аволь ансяк минек районсо, республикасонок ды сонзэ томбалеяк. Аватне эзть жаля виест, ютко шкаст. Моротнень пек парсте вастомась, кунсолыцятнень цяпамотне ды сынст сюконямонь валтнэ - ульнесть тенст сехте питней казнекс.
Аволь весть фольклоронь ансамблясь сайнекшнесь васенце тарка эрьва кодамо морамонь пелькстамосо, аволь весть морокуронтень максозель неть пелькстамотнесэ Лауреатонь лемесь, ламо эрьва кодат Шнамонь конёвсо казезель морамонь коллективесь.
Эрямось чии куроксто, теке лей чуди... Ламот неть морыця аватнень ютксто ней кулсесть, лиятне пек сыредсть. Прявтонь тевтнестэ туемстэ, Нина Павловна кочксесь-пурнась ансамблянь од состав ды кармавтызе Мария Ивановна Урявинань поладомс эсь тевензэ. Неень шкань "Вастомань" морыцятне свал кевкстнить эрьва кодат превспутомат Нина Павловнань кедьстэ. Мария Ивановнаяк пек парсте содасазо эсь тевензэ, ёроковсто вети "Вастоманть" икелев.
Ансамблясь нейгак парсте моры. Сынь сеедьстэ морсить райононь сценанть лангсо ды Мордовияньгак. 2016 иестэ морокурось ульнесь казезь "Шумбрат, Мордовия!" Республиканской народной творчествань комсеце фестивальсэнть "ВОКАЛ" номинациясонть Лауреатонь Дипломсо. Сонзэ ламо Шнамонь конёвонзо райононть пельдеяк.
"Вастомась" - велень мероприятиятнесэ свалшкань участник. Неень составсонть таштостонть кадовсь ансяк Е. А. Сеняйкина. Елизавета Алексеевна ансамблясонть морамо ушодсь кавксо иестэ.Сон сеедьстэ лецтни, кодамо ульнесь ансамблясь 60-70 иетнестэ. Тедеде сонензэ макссть райононть пельде Почетной грамота.
Ютасть уш 38 иеть, кода Протасовань культурань Кудонь "Эрзянь авинеть" морокурось кенярдовты велень ды райононь эрицятнень эсензэ моротнесэ. Пурнызе те коллективенть Лидия Александровна Симагина. Те сон тердинзе ёроков, эрзянь раськень моронь вечкиця аватнень ансамблянтень. Коллективсэнть васня ульнесть 16 ават.
Ансамблянть сцена лангс эрьва лисемазо, ваныцятненень ульнесь алкуксонь кенярксчикс. Сынськак морыця аватне покш мельспаросо морыть тиринь велесэ, районсэ ды республикасояк.
"Эрзянь авинеть" ансамблясь эри пек интересной шкинемань эрямосо. Сонзэ участникензэ аволь ансяк сынсь тонавтнить раськень культурантень, сынь кандыть неть содамочитнень лия ломантнененьгак. Эрзянь раськень морамонь сюпав лувонть, конась кадовсь тенек минек покштятнень-бабатнень пельде, эряви ванстомс ды кепедемс. "Эрзянь авинеть" морокурось кеместэ вансты кезэрень морамонь коенть, канды сонзэ эсензэ кунсолыцятнень туртов.
Морокуронть репертуарсонзо эрзянь раськень морот: " Сыре алаша", “Веле песэ репст видить”,”Вай, луга, луга”, Мордовиядо морот ды ламо лият.
"Эрзянь авинеть" ансамблясь "Шумбрат, Мордовия!" фестивалень свалшкань участник, сон сеедьстэ морси "Раськень озкс" кенярксчисэнть. Те коллективесь морамонь ёрокчинзэ кис ламоксть казезь эрьва кодамо Дипломсо ды Шнамонь конёвсо.
Кенярдовты сеяк: те морокуронтень яла совить од ломанть. Ансамблянь прявтокс вана уш зярыя иеть Любовь Васильевна Ермушева. Эсест морамосост кецявтыть ломантнесэ истя жо Лидия Ивановна Розуваева, Валентина Владимировна Инкина, Маргарита Ильинична Мурзаева, Надежда Константиновна Богданова, Александра Ивановна Богданова, Елена Александровна Асманкина, Анна Александровна Асманкина.